Si hot a vü schledres Moarkting ois di oandra ingan- deitscha Dialekti- in Ingan kamp gwuisst, souwul wa mia iah Oida seihn, sui si a himmlwait peissera Ploutz vadiana. Friiha woa si va goanza Loandstoali gsproucha in Deitsch-Weistingan, im heintga Puagnloand, owa in insa Doga keimpft um sei Iwaleiwa. Soat Joahuindeata va Stoandoatesterraichisch vadreingt, muiss da Schuitzeingl va de Reid au geign di Zuing va Globalisiering, deis Einglisch iwa Wossa pleiwa. Wi deis groußa Dreihbuik va de Sproucha vaaschreiwt, sui deis Hianzisch poid vaschwinda. Deinnast gipt deis Vuik sei 1000 Joah oidi Reid net af un si wiad nei Methoda un Proaktika finda, di di Sprouch wiada in di Moud pringa wean, ois a wittges identiteitsstiftends Element im Leiwa van Puagnloanda, un eppa au pan Weistingandeitscha. Da Oatikl is in Ousttonaupoarisch-hianzischa Reid gschriam woan/ Der Artikel wurde im ostdonaubairisch-heanzischen Dialekt verfasst.
Di mystischi oidi Sprouch va Poian un Goutn
Di deitschi Preisänz in dei ingrischa Weistgepieda geiht goanz af deis Friimittloida zrick, nou gneia in di Koarolingazat. Di erschti Siedlingsteitigkat woa mit da freinkischi Heaschoft va Koarl dei Groußa vapuinda, ois poarischi un freinkischi Koulonistn (as dei Gepied van Peischoufstiama Soizpuag un Poassau) im 8-9. Jh. in dei moast meinschnlaara, eida Poannonien plianendi un raichi Loandschoft gstoaltet howa. Za da Zat va da Grinding vam ingrischi Steiffnraich um 1000 is di neisti Stuif va da sieddeitschi Oansiedling pgounna, neimli dia di Koulonisation va Pauan as Niedapoarn un dei esterraichischa Noapoahleinda- deis Loand Deitsch-Weistingan hot sou sei Gruindfoam gwuina un a nei Stoamm van Hianza gpoana woa. Schhweida san au oandri deitschi Zuigzoagna in di hianzischa Deiffa oangkumma, Niedaesterraicha oda Stoara, im 18. Jh. Tonauschwowa, owa deis oidpoarischi Weisn, Choarakta is eahoida gpliewa. Di Pschreiwung va Koumitat Wieslpuig as 1791 sougt iwa di Hianza: „Die Bauern sind Deutsche. Reste entweder der Boier oder der Goten. Jedenfalls unterscheiden sie sich durch die Art zu sprechen allzu sehr vom übrigen deutschen Volk”. Oandri Quella neinna di Hianza „Hainreichs Gfoigsleid” („Heinrichs Gefolgsleute”), di Intatoana va Groaf va Gissing oda dei reimisch-deitscha Keisa Hainreich IV.
Wou is oiso diesi mysteriösi Zuing heagkumma?
Afta Eberhard Kranzmayer (esterraichischa Sprouch- wissnschoaftla) findt deis Hianzisch in Niedapoarn sei Heakinft- si kummt as da Sprouchfoamili (oda Sprouchhais) van ousttonaupairischa Ui-Reida (UiDialekti), un is mit dei oandra esterraichischa, poarischa Reida eing vawoand, deinnahst hat si a sea oag- na Choarakta, wous di Sproch sou psaundres mocht. Neibm hea hot da Hianz vü oidi deitschi Sprouchelementi pwoahrt, di sinst oandrischtwou net za finda san. Wia owarischt gschriam, da typischi Ui-Zwoaleit gipt deis olliwittigsti Meakmul va da Reid van Puagnloanda un Weistingandeitscha: as houdeitschi Kuh, Bub, Mutter, Schuhe, Hut wean Kui, Pui, Muida un Schui. Sulicha Ui-reidndi deitschi Vuiksgruppa haisa in Siedtirol (Puistatoal/Pustertal), in Niedaesterraich, friaha au im pehmischa Eighaloand (Egerland) und Siedmeihrn (Südmähren, nou vaa da Vatroawing 1944-45). Außa da Sprochlikat mocht di Literatua di Sprouch feawi: da pekoanntisti Huamatdichta, Josef Reich as Krottndaff pa Gissing (1860-1924), hot seigs (6) Gdichtpeinda vafosst, un wiad heint as da Vuiksdichta van Hianza un Puagnloanda geeaht. Oangi pgoasteati Intllektuelli howa hianzischi Mearcha gsoammalt, wia da steira Leihra Johann Reinhard Bünker mit sei Soammlweak „Schwänke, Sagen und Märchen in heanzischer Mundart” (1906). Af di Mearchawölt van Deitschweistingan keinna au di priahmtesta Foantasyschreiwa van insa Zat noadisch san, wos vümuls iwa oidgermonschi Vaagschicht vafiagt: mit dei Gstoalta Hex (Hexe), Teifl (Teufel), Rawuzl, Zweiga (Zwergen)- di Sunn wiad ois Sunn-Nandl (Sonnenoma), da Maon ois Maon-Neinl (Mondopa) in dei Soga eazöhlt. Heintgi Vaproading, Situation in Ingan.
Deis Hianzisch, di eiltesti deitschi Reid in Oidingan, wiad heint nia in dei oida Keangepiada gsproucha: zuimoast in Mittlpuignloand,va goanz Weinga in Eidnpuag (Ödenburg) un in sei Deiffa (Oagndaff/Agendorf, Kroispoch, wia nou im Koumitat Eisnpuig. In Ingan pekumma liawa di groußa Reida Afmeaksoamkat (Heissisch in da Proanau, Mittlpoarisch in Noadingan)- di Zoi van inganleindischa Hianza und Hianzaspreicha is afoch zu minimal, wal nou 1920, afta dei Friadnsvatroag va Trianon, nia a Haumdvull Deiffa pa Ingan gpliewa san. Si san aktivi weistingandeitschi-hianzischi Kultuavaroani, owa dies iwa dou di oidi Reid net mea, nia deis Houdeitsch neibm Ingrisch.
Rettingsoaktiona fia dei hianzischa Mourring im Puagnloand
Di teiflischi Teindenz va Sprouchvaluis mocht si in Puagnloanda sichtpoa. Fihrndi esterraichischi Zatinga pringa vümuls di Prichti iwa deis vawoasti Schicksol va Hianzisch, deiss di oanstgi huamschi „Lingua Henzonica” va Stoandoatesterraichischa (oagtl. va Weannrisch) vadreingt wiad, wal si in da esterraichischa Hapstodt un da Groußsteidta di Media mit Rui sicha heascht. Wa si net gnui san waa, vü Esterraicha valoussa iahri Reid fia di houdeitschi Oansprouchigkatwia au deis Einglisch, Deinglisch kummt schnöll viara. Dei offizielli Sprouchschuitz eafillt da Owawoata (Oberwärter) Hianzavaroan: im Joa 1996 is di Organisation ggriandt woan, vafiagt iwa a feisti esterraichischi-ingandeitschi Mitgliadschouft, un heid di Fauhn va da hianzischi Sprouchpwoahring hou: si wiada Doginga (Tagungen), Vaatreiga ghoida, sei vaeiffentlicha au Biaka in vaschiadna Theima (Kiachl, Feistdoga, Waindarlkultua, Gschicht), un Joa fia Joa a hianzischsprouchlichs Kolendarium. Innovativawoas hot da Varoan vaa poar Joahri sei Teitigkat mit a Youtube-Konal eageinzt, wou Muindoatgschichta, wia Gdichta vaagleisa weada. Oangi puignloandischi Schuila wuin au net aspleiwa un mocha mit: di BAfEP Owawoat (Bundesbildungsantalt für Elementarpädagogik Oberwart) fiahrt mit dei Hianzavaroan a gmuansoams Vasuichsprojekt, di „Wortpatenschaften”: dur di Kooperation suin deis Hianzisch, bzw. hianzischi Asdricka in deis Leaprougramm afgnuamma weada: Va oana explizita hianzischa Sprouchintarriacht is owa nou koa Reid. A wettri Sprouchquell san di vü Huamatbiaka, di van Gmuanda, Deiffa rasggeiwa weida, heifi mit Weatabiaka vaseihn. Aussa da Schuila un da Pvuikering hot au deis Moarkting di huamatzentrierti Kroufft va dei Dialekt entdeickt, deiss moanichi Suipamoarkta hianzischi Groußwearpinga asplokatiara.
Owa wa Oana frougt, op deis Hianzisch iwahaps a Zuikinft hot? Di Pstreiwinga san wul im Guang, va da Soat van Hianzavoroan, dei Deiffa, oangna Schuiln, owa a zeintroali Richting va puagnloandischi Loandsfiehring fahlt nou, deiss si fia di Soch va dei Hianzisch au mit da Wissnschouft zammoawata. Zerscht prau si an oanhoatlichs Weatabuik un di Stoandoatisiering va de Reid, wal deis Hianzisch vü Neibmvorianta, Daffmuindoata afweisa kaunn, owa net mul stoandoatisiert woan is: deisseiwi Problem wia pan oandra ingandeitscha Dialekta. Deinnast, dia a Kooperation mit dei weistingandeitschi Gmuanschoafta (Eidnpuag, Stanamoanga, usw.) waa deis Schouffa van a hianzischi Regionalsprouch theoretisch meigli, wa deis Vuik van Oalpnvaaloand iah Reid fia di neisti Generationa wiakli reitta wuin. Oans is hoid sicha: deis Hianzisch geiht nou net Heia! (das Heanzisch geht noch nicht Heia: auf Heanzisch/ Bairisch: zum Schlafen gehen).
Di Neitzsoat va Hianzavaroan: http://www.hianzenverein.at/
Da hianzischi Youtube-Koanal: https://www.youtube.com/@hianzenvereinburgenland
Der Titel in hochdeutscher Übersetzung: “Heinrichs Gefolgsleute geben ihre Sprache/Rede nicht auf: Das Heanzisch und seine Zukunft”
Beitragsbild: “Das historische Verbreitungsgebiet von Deutsch-Westungarn”- erstellt von Patrik Schwarcz-Kiefer und Stefan Pleyer
